කාන්තාවන් වහාම දැනුවත් වෙන්න සුද යැම රෝග රැසක මූලික ලක්‌ෂණයකි.

 කාන්තාවන් වහාම දැනුවත් වෙන්න සුද යැම රෝග රැසක මූලික ලක්‌ෂණයකි.
ආචාර්ය වෛද්‍ය දයානි සිරිවර්ධන
කොළඹ විශ්වවිද්‍යාලයේ දේශීය වෛද්‍ය විද්‍යායතනයේ
ප්‍රසව හා නාරි රෝග පිළිබඳ ජ්‍යෙෂ්ඨ කථිකාචාර්ය

කාන්තාවන්ට බහුලව වැළඳෙන රෝග අතර සුද යැම ප්‍රධාන තැනක්‌ ගනී. බොහෝ කාන්තාවෝ මෙන්ම තරුණියෝ ද මෙම රෝග තත්ත්වයෙන් අපහසුතාවට පත්ව පීඩා විඳිති.

සුදයැම යනු කුමක්‌ද?

බොහෝ කාන්තාවන් සුදයැම රෝගයක්‌ ලෙස සිතා සිටියත් මෙය රෝගයක්‌ නොව රෝග කිහිපයකට අදාළ ප්‍රධාන රෝග ලක්‍ෂණයකි. එනම් යෝනි මාර්ග ආශ්‍රිත දිලීර, ගැබ්ගෙල පිළිකා, සෙම්රෝග, මානසික පීඩාව, විවිධ රසකාරක ආහාර බහුලව ගැනීම, පණුරෝග ගර්භාෂ ගෙඩි, ගර්භාෂ පහත්වීම ඩිම්බකෝෂවල ගෙඩි, හෝමෝන අසමතුළිතතා වැනි රෝග රැසක ප්‍රධාන රෝග ලක්‍ෂණයක්‌ ලෙස සුදයැම ඇති වේ.

මීට අමතරව අපිරිසිදු යට ඇඳුම් ඇඳීම, බහුපුරුෂ සේවනය, උපත් පාලන ඖෂධ නිතර නිතර ගැනීම, උපත්පාලන උපකරණ පැළඳීම නිසා යෝනි මාර්ගය ආශ්‍රිතව ඇතිවන වෙනස්‌කම් නිසා ද සුදයැම ඇති වේ.

සුදයැම හඳුනාගන්නේ

කෙසේ ද?

සාමාන්‍යයෙන් කාන්තාවන්ගේ යෝනි මාර්ගයෙන් ශ්‍රාවයන් පිටවේ. එම ශ්‍රාවයන් සමඟ තද පැහැති දුර්ගන්ධයක්‌ සහිත, කැටි ගැසුණු ශ්‍රාවයන් පිටවේ නම් වේදනාකාරී නම් සුදයැම ඇතිවී ඇති බවට හඳුනාගත හැකිය.

මෙම ලක්‍ෂණවලට අමතරව නිතර නිතර කෝපය ඇතිවීම, සිරුරේ බර අඩුවීම සමේ පැහැය දුර්වර්ණවීම, ඇස්‌ යට කළු පැහැයක්‌ ඇතිවීම, ඇස්‌ දීප්තිමත් බවින් අඩුවීම, මුහුණ මලානික බවින් යුක්‌තවීම, හන්දිපත් වේදනාව, නින්දෙන් අවදි වූ විට දැඩි අලස බවක්‌ පැවතීම. කෑම අරුචිය, මුත්‍රා දැවිල්ල වැනි රෝග ලක්‍ෂණ ද මතු වේ.

සුදයැම ලෙස ශ්‍රාවය වන්නේ මොනවාද?

සුදයැමේදී ශ්‍රාවය වන්නේ සිරුරේ සෞම්‍ය ධාතු කොටස්‌ය. එබැවින් එම ධාතු කොටසක්‌ අධික ලෙස පිටවීම නිසා ඉහත දැක්‌වූ ශරීර ලක්‍ෂණ මතු වේ. එසේම සුදයැම බොහෝ විට සිදුවන්නේ ඔසප්වීමට සති දෙකකට පමණ සිටය. එනම් ඔසප් චක්‍රයේ සරුකාලය අවසන් වූවාත් සමගය.

ප්‍රතිකාර ලෙස

කළ යුත්තේ කුමක්‌ද?

මෙය රෝග රැසකට අදාළ රෝග ලක්‍ෂණයක්‌ බැවින් අදාළ රෝගය හඳුනාගෙන ප්‍රතිකාර කළ යුතුය. උදාහරණයක්‌ ලෙස ගර්භාෂ ගෙඩි නිසා හෝ ඩිම්භකෝෂ ගෙඩි නිසා සුදයැම පවතී නම් ඊට අදාළව ප්‍රතිකාර කළ යුතුය. මානසික පීඩනයක්‌ නිසා සිදුවේ නම් මානසික පීඩාවට අදාළ ප්‍රතිකාර කළ යුතුය.

ප්‍රතිකාර නොගෙන

සිටීම භයානකද?

අනිවාර්යයෙන්ම ප්‍රතිකාර ගත යුතුයි. එසේ නොවුනහොත් විවිධ ආසාදන යෝනි මාර්ගය තුළ ඇති වී ගර්භාෂයට පැලෝපීය නාලවලට බලපායි. විශේෂයෙන්ම දරුවන් ප්‍රසූතකර නොමැති කාන්තාවන් සුදයැම පවතින විට නිසි ප්‍රතිකාර නොගැනීමෙන් ඔවුන්ගේ පැලෝපීය නාලවලට හෝ ගර්භාෂයට ආසාදන ඇතිවීමෙන් වඳභාවයට පත්විය හැකිය.

අතර්ජාලයෙන් උපුටා ගැනීමකි